Næsti tátufundur verður 15. janúar - Gleðileg jól!
One blogger is looking for pledges to show support for women in technology. A good idea I thought.
Here is the background story:
http://findingada.com/
Here is the petition:
http://www.pledgebank.com/AdaLovelaceDay
Úti er snarvitlaust veður en í faðmi björgunarsveitarinnar Ársæls voru þær hugrökku tæknitátur sem mættu á fundinn í kvöld einstaklega öruggar.
Við þökkum þeim sem mættu kærlega fyrir komuna og erum strax farnar að hlakka til þess að hitta ykkur á janúarfundinum.
Voruði ekki örugglega búnar að skrá með stafræna pennanum ykkar þann 15. janúar?
Hérna er plakatið sem lýsir fundinum á fimmtudaginn. Endilega prentið út og hengið upp eða sendið áfram á tátur eða drengi sem þið haldið að hafi áhuga.
Vonumst til að sjá ykkur sem flestar á fimmtudaginn!
Arctic Girl Geek Dinner verður að þessu sinni haldinn í húsnæði björgunarsveitarinnar Ársæls í Reykjavík sem er í Grandagarði. Þar munum við fræðast örlítið um þá gríðarlegu tækni sem liggur að baki björgunarstarfi á Íslandi.
Á mælendaskrá eru þrír:
* Fulltrúi björgunarsveitarinnar Ársæls
* Vala Hauksdóttir, sérfræðingur í fjarskiptum
* Ríkharður Sigmundsson, sérfræðingur í staðsetningartækjum
Að framsögn lokinni munum við rölta á Sjávabarinn sem er í næsta húsi. Þar verður sjávarréttahlaðborð á boðstólnum fyrir litlar 1300 kr.
Að venju eru strákar velkomnir í fylgd með tæknitátu. Fundargjöld eru litlar 1000 krónur en þeim fylgir einn drykkur á matsölustaðnum.
Hlökkum til að sjá ykkur!
Okkur langar til að biðja ykkur um að merkja strax við í dagatalinu að þið ætlið að koma á Arctic Girl Geek Dinner þann 11. desember klukkan 18.
Að þessu sinni verður umræðuefnið björgunartátur og hvernig tæknin er nýtt í björgunarstarfi.
Við erum að vinna í því að ganga frá fyrirlesurum og húsnæði og þið fáið fundarboð með nánari upplýsingum þegar nær dregur.
Nú, fyrst þið eruð með pennann á lofti við dagatalið þá skulið þið líka merkja við 15. janúar en þá verður janúarfundurinn.
Hlökkum til að sjá ykkur!
Fyrsta tæknitátukvöldið var stórvelheppnað. Um 20 tátur mættu og blönduðu geði. Við þökkum fyrir síðast og hlökkum til að sjá ykkur á næsta tátukvöldi.
Talandi um það þá er hér dagskráin fyrir veturinn:
Desember: Öryggistátur - Fjallað verður um notkun upplýsingatækni í björgunarsveitum.
Janúar: Hefðartátur og ungtátur - Þær sem ruddu brautina og þær sem eru að bætast í hópinn segja frá sinni upplifun.
Febrúar: Listatátur - Fjallað verður um notkun upplýsingatækni í listum.
Mars: Rannsóknatátur - Hvað eru tátur í akademíunni að rannsaka?
Apríl: Lífstíll tæknitátunnar - Tölvutöskur, farsímar, tölvur etc fyrir tátur.
Maí: Frumkvöðlatátur - Tátur sem hafa stofnað og rekið sín eigin fyrirtæki lýsa reynslu sinni.
Listinn er örlítið breyttur frá því sem tilgreint var á kvöldinu (eitthvað skolaðist til í minni fortáta fyrir fundinn).
Hljómar spennandi, ekki satt??
Undirbúningur fyrir næsta fund er að hefjast og við sendum ykkur stað og stund eins fljótt og við getum svo að þið getið farið að skipuleggja ykkur.
Vá! Tæknitátugrúppan á Facebook hefur stækkað langt framar vonum og í morgun gerðist sá merki atburður að meðlimir grúppunnar urðu fleiri en 100!
Svakalega erum við flottar :)
Viljum endilega hvetja ykkur til að koma sem flestar á fyrsta tæknitátukvöldið á þriðjudaginn kemur!
Hér er auglýsing fyrir fyrsta tæknitátukvöldið. Endilega sækja, prenta út, senda og deila með öllum tæknitátum sem þið þekkið.
Sjáumst á þriðjudaginn!
Það er ekki eftir neinu að bíða svo við blásum nú til fyrsta Arctic Girl Geek Dinners-ins næsta þriðjudag 11. nóvember klukkan 20:00.
Umræðuefni kvöldsins verður tilurð félagsins en Kristín Sólveig Kristjánsdóttir mun halda stutta tölu um hvernig hugmyndin kom til og af hverju hún fann sig knúna til að standa fyrir stofnun klúbbsins. Í framhaldi af því mun hún kynna dagskrá vetrarins sem er nú þegar orðin smekkfull og gríðarlega spennandi.
Brynja Baldursdóttir verður fundarstjóri kvöldsins.
Staðsetning: Veitingastaðurinn Balthazar (áður Victor), Hafnarstræti 1-3, önnur hæð.
Fyrirkomulagið verður með hefðbundnu sniði, þ.e. aðgangur er takmarkaður við 1000 krónur sem felur í sér einn drykk og Balthazar býður upp á léttan matseðil fyrir þær sem vilja. Ef þið þekkið tæknitóta sem vilja taka þátt þá eru þeir velkomnir í ykkar boði.
Eftir viðtökurnar á Facebook erum við gríðarlega bjartsýnar að sjá sem flestar!
Hlökkum til!
UT konur standa fyrir mjög athyglisverðum atburði þann 5. nóvember eða eins og segir í tilkynningu:
*Kæru UT-konur! *
Við ætlum að koma saman miðvikudaginn 5. nóvember og eiga skemmtilega og notalega stund saman þar sem við lærum að efla sköpunarkraftinn undir handleiðslu Guðbjargar Gissurardóttur.
Guðbjörg hefur áralanga reynslu af því að vinna með skapandi og frjóa hugsun og verður því spennandi að fá hana til liðs við okkur.
Guðbjörg ætlar að kenna okkur að efla sköpunarkraftinn til gagns fyrir okkur sjálfar og þá sem eru í kringum okkur. Þetta er líka skemmtileg leið til að læra að vinna á skapandi hátt með málefni í daglegu lífi jafnt í vinnu sem heima.
Svo erum við allar konur .... og eins og staðan í dag sýnir okkur er verið að setja konur í ríkara mæli í ábyrgðarstöður.... þannig að það er ekki úr vegi að efla þennan kraft sem í okkur býr enn frekar til að takast á við það sem í vændum er.
Dagskrá kvöldsins verður í grófum dráttum þannig í tveimur liðum:
- Hvernig nýtum við sköpunarkraftinn daglega í starfi okkar
- Prófum að nota aðferðina til að koma með nýjar hugmyndir að því hvernig við kynnum ungu stúlkunum störf okkar/starfsumhverfi
*Staður og stund:*
Háskólinn í Reykjavík, miðvikudaginn 5. Nóvember kl.20:00-22:00.
Fjölmennum og endilega takið með ykkur vinkonur ykkar í UT-geiranum
Stjórn UT-kvenna
**
Meira um Guðbjörgu:
Guðbjörg Gissurardóttir útskrifaðist frá MHÍ sem grafískur hönnuður 1990. Hún fór í meistara nám í “communication design„ í Pratt Institute, New York og hefur starfað við grafíska hönnun og auglýsingar bæði á íslandi og NY. Guðbjörg hefur kennt “skapandi hugsun„ bæði í LHÍ og í Pratt. Ásamt kennslunni hefur hún haldið fjölda fyrirlestra og námskeiða fyrir fyrirtæki og einstaklinga, þar sem sköpunargáfann er í fyrirrúmi. Árið 2003 gaf hún út matreiðslubókina “Hristist fyrir notkun” þar sem fólk er hvatt til að nota sköpungargáfuna í eldhúsinu.
Guðbjörg starfaði í tæp þrjú ár sem framkvæmdastjóri Hönnunarvettvangs, sem var kynningar og upplýsingamiðstöð fyrir íslenska hönnun, eða þar til janúar 2008. Í dag er Guðbjörg í fæðingarorlofi.
Tæknitátur ættu náttúrulega ekki að láta sig vanta.
Stofnandi fyrsta Girl Geek Dinners-ins og leiðbeinandi okkar í gegnum þetta ferli heitir Sarah Blow. Hún er hugbúnaðarverkfræðingur sem vinnur einkum í hugbúnaði fyrir farsíma og þráðlaus samskipti. Hugmyndin kom til í ágúst 2005
Hún er persónulega til stuðnings fyrir alla þá sem vilja stofna Girl Geek Dinner klúbba og vill veg þeirra sem mestan.
Viðtal við hana á BBC Worldservice núna í október 2008.
Októberfundurinn hjá Girl Geek Dinner í London bauð upp á frábæra fyrirlesara sem fjölluðu um konur í upplýsingatækni og hvaða kröfur eru gerðar til þeirra varðandi hegðun, atferli og framkomu.
Flestar eigum við sögu af vandræðalegum uppákomum sem rekja má til þess að kyn okkar hefur valdið einhverskonar uppþoti. Liðsheildaræfingar þar sem ekki er gert ráð fyrir bæði konum og körlum. Fyrirlestrum um klæðaburð til kvenna þar sem virðist vera í lagi fyrir strákana að mæta í fermingarjakkafötunum. Undarlegar athugasemdir á útlit eða kyn og svo mætti auðvitað lengi lengi telja.
Við mælum með að þið horfið á vídeóið.
Þegar við ákváðum að stofna Girl Geek Dinner á Íslandi rákumst við strax á það að við vissum ekki hvað við ættum að kalla okkur. Girl geek hafði ekki verið snarað á íslensku og við tengdum ekki við orðið 'kvennörður'. Á íslensku má alltaf finna svar, kvað skáldið og þess vegna þurftum við að geta nefnt okkur.
Brynja Baldursdóttir tæknitáta býr svo vel að vera dóttir Baldurs Sigurðssonar íslenskufræðings og hún bar erindið undir hann. Hann brást vel við og eftir nokkra rannsóknarvinnu stakk hann upp á orðinu tæknitáta.
Við vissum strax að okkur langaði að vera tæknitátur og eftir því sem við bárum orðið upp við fleiri tátur þá sáum við að þarna fundum við samhljóm.
Arctic Girl Geek Dinner klúbburinn er stofnaður að breskri fyrirmynd en fyrsti klúbburinn var stofnaður í London í ágúst 2005.
Síðan þá hafa klúbbarnir sprottið upp um allan heim og eru nú í hverju heimsins horni, frá Kanada til Nýja Sjálands og nú á Íslandi.
Allir Girl Geek Dinner klúbbarnir hafa það að markmiði að efla tengslanet tæknitáta, að fjalla um ýmis tæknileg og fræðileg málefni og vera jákvæðar fyrirmyndir. Fundirnir eru óformlegur og léttleikandi vettvangur þar sem tátur hittast og kynnast einhverju nýju og ræða málin. Á hverjum fundi, sem haldinn er á veitingastað eða bar, er haldinn stuttur fyrirlestur (eða tveir) um áhugavert efni en síðan er áhersla lögð á góðan mat og drykk.
Framtíðarsýn
Tæknitátur hafa þá framtíðarsýn að breyta heiminum. Að hafa þau áhrif að gera tækni áhugaverða og aðgengilega fyrir alla óháð kyni, staðsetningu, aldri.
Þess vegna vonumst við til að sjá sem flestar tátur og félaga á fundum!
Já, við sögðum félaga, strákar eru nefninlega velkomnir. Eina skilyrðið er að hver strákur sé í boði einnar tátu, þannig höldum við kynjahlutfallinu jöfnu. Allar erum við orðnar leiðar á því að vera eina konan í salnum á tæknilegum og fræðilegum þingum.